طول الليل | ميرزا عدنان العمران

للشاعر | محمد أحمد البدي

كلمات القصيدة

طول الليل .. يحسين اعلى بالي

ضجة خيل .. مَـتـفـارگ خيالي

افـز ، اتطـشر ، ألتم

نصبت أحلامي مأتم

طول الليل

اصفن صفنة الميتين

مايرمش جفنها العين

ليلة عاشرك يحسين .. طويله

مثل  ماترجف السعفه

هزيله أنفاسي مرتجفه

اوگف باچر الوگفه .. هزيله

القطا لو ينترك چا نام !

مطارد حزني او لاحلام

هيمه و كوفه ، مجلس شام .. ثچيله

سكـتـة خوف .. بس حس النواعي

حولي يطوف .. چم طيف لضياعي

النوم أجفاني حرم

نصبت أحلامي مأتم

طول الليل

وحدي وظلمة الغيمه

اسمع بس دوي الشيمه

وباچر شامت بهيمه .. سبيه !

تشد الخيمه هسه ارجال

وباچر بس تشدني حبال

بوجهي الچلمه من تنگال .. اذيه

رگـبـه مـتـانـيـه الـسـياف

ترس وجهي السهر ينشاف

العفو مو جسمك الينعاف .. رميّه

خيال السوط .. شما اشرد لحگني

واسعى بشوط .. وايديني علمتني

عطش و امودعه زمزم

 نصبت أحلامي مأتم

طول الليل

خريف بريـة الورگه

مسامر انا و الفرگه

زماني ويه الفگد رفگه .. رماني

آخـر لـيلـه تجـمعـنا

تمسح گلبي و اتطمنه

خوف ويمّك اتمنى  .. اماني

الاخو لمتن اخته عكازه

و يطيح اليفگد اعزازه

جنـازه بلايـه جنّازه .. اتاني

صم تراب .. راح ابگى بغيابك

الريح الهاب .. ياخذني لمصابك

صبحي وصبحك اظلم

 نصبت أحلامي مأتم

طول الليل