دربين مشيت اويا المنية يحسين  عليهم وش بيديه

وياكم أميرة ابلياكم أسيرة (زينب  ضيعتها  الغاضرية)

عهـد منـــــي أمشي ابدربك ما أنساك

آه يا ابن أمي  دنيا وآخره   وياك

أمشي ابصبري وآطوف وأسعى ابمسعاك

ويعــــــذبني يا روح الزهــــره فــرقاك

دربي اوياكم مشــيته وعهدي لا ما نسيــته

إعبر بعيوني البلوى ماتغمض أجفاني

ابكل شدّة وكل مصيبة يا بو الشيبة الخضيبة

أتحدّى الدنيا كلها يا ساكن وجداني

يحسين يثار الله ونبيه ويّاك  عهد  حتى المنية

لو نفنا ظمايا إسمك يبقى راية (زينب تحمله بالغاضرية)

الدرب الطف تظللنا المنايا

ابخطاك أمشي وحمى شيال الرايه

معاكم ما يهم  عصف الرزايا

اولو كلنا على الشاطي  ظمايا

وياك اشما يجينـــي هاين كل شي في عيني

ياللي امنسيني اهمومي بس اعيوني اتشوفك

لكن بعـــدك يــغالي كل أيامي ليـــالي

ويـــاك أتذكــــر عـــزي و أتذكــر معــــروفــك

من وين أفصّل بالرزية يحسين من إهلال المنية

وما بيني وبينك راية أربعينك (زينب وصّلت للغاضرية)

شعدد لك يخويه وشحسب آلام

وبعد عينك شسولف عن درب الشام

درب يطوي ابعمري شريط الأيام

وأعدد جم في قلبي امن الطف اسهام

سهم العين الرماني وسهم القربه الإجاني

وسهم اللي ايصوب طفلي نسّى ابقلبي اجروحي

وسهمك ياابن امي سهمك سيّل دمّي اويا دمّك

هذا اللي فطّر قلبي وهذا الذوّب روحي

سهمين ولا واحد خطاني سهمين كل من ينسّى الثاني

فرقاك العصيبة والشام المصيبة (من وين الصبر يا الغاضرية)

يخيروني بعد السبا ابهالدربين

يا زينب يا حزينه اتخيّري الوين

درب طيبه ودرب يا زينب لحسين

صحت لحسين أروّي قبره بالعين

مر بينا الطف يحادي وادي وما مثله وادي

تتزود منه روحي وأقضي اوياه  أيامي

يا حادي لو بديه مر بينا الغاضريه

عند ابن امي أزوره وأنسى اوياه آلامي

يحسين إجيتك  بالسبايا يحسين شفصّل من رزايا

يالفي روحي نارك لا ما ننسى ثارك  (والعباس حامي الزينبية)